O conselleiro de Sanidade, Antonio Gómez Caamaño, negou este martes que haxa un “colapso” no Servizo Galego de Saúde (Sergas) durante o verán, aínda que si recoñeceu que pode haber “momentos de maior tensión” porque, reiterou, “non hai xente para contratar”.

Deste xeito respondeu o conselleiro ao ser preguntado polos medios, en Santiago de Compostela, sobre as críticas vertidas polo sindicato de Enfermería Satse a semana pasada relativas á “falta dunha planificación” nalgunhas comunidades, entre elas Galicia, que provoca “sobrecarga e colapsos”.

Plan de verán

Gómez Caamaño dixo descoñecer as reivindicacións de Satse, pero si respondeu que non cre “que exista colapso” e que, ante eventuais “momentos de maior tensión” en centros de saúde e urxencias, o Sergas ten “un plan de verán que cobre todas esas necesidades”.

De feito, o titular autonómico de Sanidade explicou, hai poucos días que o Complexo Hospitalario de Pontevedra necesitou aumentar a dotación de camas “e puxéronse sen ningún problema”.

“Fálase de contratar máis xente, onde está esa xente? Non hai xente para contratar nas listas”, criticou o conselleiro, quen tamén recalcou que o persoal “ten dereito a vacacións”.