Nos tempos finais da guerra pola independencia dos EEUU, Charles Lynch, un virxiniano de orixes irlandesas, ordenou a execución dun grupo de persoas sospeitosas de actividades anti-independentistas que foran xulgadas e absoltas por un tribunal. Desa actuación, contraria a todo tipo de dereito –mesmo o non escrito–, surxiu o vocábulo linchamento, que foi –e segue a ser– practicado polo mundo adiante. Entre nós –penso que desde os primeiros anos da posguerra– non é práctica común, aínda que, perante casos realmente terroríficos se poidan escoitar voces favorables a tomar a xustiza pola man. Mais, por estes lares os presuntos delictos económicos, por graves que fosen, non producen terror. É por iso que o ex director xeral de Caixa Galicia, José Luis Méndez, nada tería que temer no tocante a linchamentos. Non obstante, solicita protección na súa comparecencia no Parlamento. Esquece que a policía a pagamos todos, estafados incluídos? Canta indecencia e iniquidade! Que desvergoña!