Deputación da Coruña impulsa formación para acadar 60% inserción laboral

diego calvo, condecorado p. puig
|

A Deputación da Coruña puxo en marcha hoxe o programa formativo "Redexiana2" que nace co obxectivo de acadar un 60 por cento de inserción laboral.

O presidente da Deputación da Coruña, Diego Calvo, inaugurou esta mañá no Centro de Formación de Ames o primeiro curso incluído dentro deste proxecto en que participarán 18 desempregados procedentes de toda a bisbarra.

Co curso "Montaxe e mantemento de instalacións eléctricas de baixa tensión" deu comezo unha programación de 151 accións formativas que terán lugar ata o ano 2015 nos 90 municipios da provincia con menos de 50.000 habitantes.

Os cursos versarán sobre seis áreas: servizos de proximidade para a dependencia, enerxías renovables, industria e maquinaria, transporte e loxística, agricultura e creación de empresas e autoemprego.

"RedeXiana2" é un proxecto que nace co reto de acadar unha porcentaxe superior ao 60 por cento de inserción laboral dos participantes, incrementar o nivel formativo das persoas desempregadas e fomentar o autoemprego acompañado co financiamento de 12 plans de empresas que saian de proxecto provincial.

A principal novidade de "RedeXiana2" será que os participantes rematarán os seus estudos teórico-prácticos recibindo un certificado de profesionalidade que suporá un recoñecemento oficial da súa capacitación para acceder ao mercado laboral.

Calvo destacou que a Deputación da Coruña leva desde 2001 traballando en programas de inserción laboral con bos resultados como o do antecesor a "RedeXiana", en que o 62,4 por cento dos alumnos encontraron traballo e formáronse 25 iniciativas empresariais.

Ademais, o presidente da Deputación destacou a colaboración das diferentes administracións para que este programa sexa unha realidade e lembrou o convenio subscrito coa Xunta para impartir formación acreditada e o "esforzo" realizado polos concellos sede destes cursos para adaptar as instalacións aos requisitos esixidos para a súa homologación. EFE

Deputación da Coruña impulsa formación para acadar 60% inserción laboral