Que teñen en común Xosé Luis Torrado “O Bruxo”, o descubridor de Atapuerca Emiliano Aguirre, a presentadora Paula Vázquez, o mago Lorente de Castro, o historiador Santos Juliá, o fotógrafo Vari Caramés, a historiadora Manuela Santalla, a actriz Mabel Rivera, o editor de García Márquez e Cortázar Paco Porrúa, Isaac Díaz Pardo, as poetas Medos Romero e Eva Veiga, o escrior Vicente Araguas, o psiquiatra Carlos Castilla del Pino ou o exalcalde e periodista López Ramón? O seu nacemento ou estreita vinculación coa cidade de Ferrol e a súa comarca. Tamén, o ter sido entrevistados no suplemento dominical de Diario de Ferrol Nordesía.
Agora, 43 das máis de 200 entrevistas aparecidas no dominical entre 2004 e 2007 –o tempo en que a coordinación do mesmo correspondía aos periodistas Nicolás Vidal e José Gómez Fandiño– veñen de seren recollidas no volume “Ferroláns de seu” (Edicións Embora). O traballo, que inclúe as caricaturas realizadas para cada entrevista semanal por Juan Veiga, preséntase ás oito desta tarde na Galería Sargadelos coa presenza de Vidal e Gómez Fandiño, así como algúns dos entrevistados.
beneficios para lazos
Os beneficios da venda de “Ferroláns de seu” serán destinados polos seus autores á a Asociación Lazos Pro Solidariedade-Comité antisida de Ferrol, unha entidade de defensa dos afectados/as polo VIH e as drogas. O acto en Sargadelos contará coa presenza do seu responsable na comarca de Ferrol, Carlos Varela.