O PSOE reclama ter voz nas cuestións do memorial ás vítimas da ditadura franquista

O grupo municipal socialista de Ferrol reclama que se convoque a Mesa da Memoria Histórica para abordar a inauguración do memorial ás vítimas da ditadura franquista e que se constitúa o consello sectorial para desenvolver a Lei de Memoria Democrática, unha xestión, esta última, que quedara en tramitación e sobre a que urxen a finalizala ao goberno do Partido Popular.

Os socialistas denuncian que son “o único grupo que non está convocado ás reunións” nas que se tratan cuestións relativas ao monumento ás vítimas, “malia ser o que impulsou esta mesa [a de Memoria Histórica] e desbloqueou e deixou rematado, agás a base, o propio memorial”.

Consideran que sería o organismo máis apropiado para abordar aspectos da inauguración, posto que aí están representados todos os grupos municipais, a comisión pro-memorial e a Asociación de Memoria Histórica.

Aprazamento

A inauguración do monumento, obra de Manuel Patinha, no parque Antón Varela de Canido estaba prevista para este día 20, pero foi adiada ao 24 de febreiro ao estarmos en período electoral e estar prohibidos actos deste tipo, que se poidan interpretar dalgunha maneira como propagandísticos. Supón un novo atraso nun monumento que nos últimos tempos tivo problemas coa execución da base da obra, que finalmente se encargou a outra empresa.

A asociación Memoria Histórica Democrática expresou nun comunicado o seu acordo con este cambio de data, xa que permitirá, explican “a realización completa dos elementos do memorial, a difusión adecuada e unha maior participación das familias e persoas interesadas”.