10º-14º
jueves | 25 abril | 2024
Con gran éxito de público e un excelente ambiente celebrouse onte en Moeche a cuarta edición da Feira do Queixo, unha cita consolidada xa na axenda do municipio e ineludible para os apaixonados do devandito produto lácteo.
“Estamos moi contentos. Houbo máis xente que o pasado ano e as queixarías están a vender moito”, comentaba ao mediodía a alcaldesa Beatriz Bascoy. Algunhas, de feito, esgotaron practicamente o seu produto na xornada de mañá, o que amosa a boa acollida que na zona está a ter o evento.
Un total de 24 produtores –16 procedentes da propia comarca e doutros puntos da comunidade galega e oito chegados de Asturias, Castela e León, Extremadura, Cantabria e Francia– ofreceron as súas especialidades, que o público tivo oportunidade de saborear xunto a outros produtos como o pan, o mel e os doces tradicionais.
Este ano, como novidade, introduciuse a figura do “Queixo convidado”, que correspondeu á variedade de Gamonéu, procedente de Onís.
Esta circunstancia motivou a visita á feira dunha delegación de 55 persoas deste concello asturiano –encabezadas polo seu rexedor, José Manuel Abeledo–, ás que se lles brindou unha recepción oficial por parte do Concello, encabezada por Bascoy, e que tamén contou coa presenza da deputada do BNG, Ana Miranda, do primeiro tenente de alcalde de Somozas e do rexedor de San Sadurniño.
As vendas rexistradas pola queixaría asturiana foron tan boas que xa contan con voltar á cita o vindeiro ano, comentou a rexedora.
Catas
Un ano máis, a feira salientou, entre outros aspectos, pola ampla variedade de propostas deseñadas arredor do elemento protagonista da xornada.
Habilitouse, por exemplo, unha zona de catas dirixidas polo experto Alejandro Montes, nas que o público puido probar catro tipos diferentes de queixo acompañados de viño.
Tamén no apartado de gastronomía enmarcouse o concurso de pratos elaborados con queixo, dos que foron premiados os mellores doces e salgados grazas ao apoio de Lácteos de Moeche –que colabora no programa–, Queixos Brigantia, Queixos Sanjurjo, Panadaría Santa Cruz, Panadaría Miguel, Bar O Mercado e a Casa do Mel de Goente.
Os obradoiros de cerámica e de elaboración de queixo –este último da man das veciñas de Gandería Lavandeira–, dirixidos á rapazada, atoparon unha excelente reposta de participación.
Música co Dúo Rosas e o grupo folk Encrucillada, a actuación do pallaso Peter Punk ou a apertura do castelo para a súa visita complementaron un programa co que o Concello quere poñer en valor o queixo local –do que a fábrica Lácteos de Moeche, con 60 anos de vida, fabrica na actualidade preto de 50.000 kilos ao mes– mais tamén dar a coñecer pequenas queixarías que están a apostar pola innovación e a calidade.
“O balance da feira é marabilloso. Supón un esforzo para moita xente, pero compensa, xa que permite incluir a Moeche no mapa de concellos galegos nos que se fan feiras con éxito”, salientaba onte a alcaldesa.
A edición deste ano contou así mesmo cunha campaña de promoción previa na que se implicaron varios locais de hostalería de Ferrol e Narón e que desde o xoves e ata o sábado serviron como aperitivo dous dos queixos que onte, xa no recinto do mercado, compartiron protagonismo con outras deliciosas variedades.
