O Torrente Ballester será o escenario mañá xoves, ás 12.00 horas, da entrega dos XIV premios Alecrín, que organiza a Federación de Entidades Culturais Galegas en Catalunya –Fegalcat–, cada ano nunha localidade de Galicia. Neste acto, conducido pola xornalista Eva Mazás Arnoso e co peche da rondalla Nas Ondas do Mar, entregaranse un total de 16 galardóns, entre os que se atopa unha importante representación local.

Coa iniciativa, que naceu no 2010 cun primeiro acto en Llagosta, Barcelona, despois de realizar homenaxes individuais durante tres anos consecutivos en Galicia, a Fegalcat distingue a varias persoas e entidades relevantes do ámbito da cultura galega.

Afortunados

María Manuela Díaz Orjales, cantante ferrolá, pintora e loitadora pola lingua galega, recoñecerase pola promoción cultural e o obradoiro compostelán Sanín Percusión Tradicional pola artesanía popular. Ferrol volverá ser protagonista co premio a Cristóbal Dobarro Gómez, no eido da empresa de Galicia, e ao escritor Pedro Xosé Blanco Llano, pola defensa do idioma galego. 

No eido da investigación, distinguirase a Alexandre Sotelino Losada; no empresarial galego no exterior, ao fundador do grupo Dúplex, Pedro Pérez, e no da literatura, á poeta e xornalista eumesa Eva Veiga. Por outra banda, na música tradicional e na comunicación escolleuse a dúas persoas de orixe local: o compositor José Manuel Couce Fraguela e a presidenta do Club de Prensa de Ferrol, Julia Díaz Sixto, respectivamente.

O Alecrín da emigración outorgarase ao presidente da Fundación Castelao Miguel Anxo Seixas; o da promoción do deporte feminino, á entrenadora de fútbol sala ferrolá Bea Seijas; o musical, ao Real Coro Toxos e Froles pola súa traxectoria; ao propio Concello de Ferrol, o da promoción do Camiño Inglés, e como escritora local se destacará a Ánxela Loureiro. Ademais, entregarase o Alecrín berciano ao redactor de infobierzo.com Héctor Keudel Álvarez, e polo seu labor na defensa da lingua no exterior, ao lectorado de galego en Mozambique.