Durante esta semana, case 40 estudantes de grao, máster e doutoramento forman parte dun Programa Intensivo Combinado no Campus Industrial de Ferrol que comezou o pasado luns.

Trátase dun proxecto organizado pola Universidade de Coruña coa participación de institucións como a  University of Zagreb de Croacia, University of Belgrade de Serbia, Tampere University de Finlandia, Vidzeme University of Applied Sciences de Letonia. Tamén colaborarán a National University of Science and Technology Politehnica Bucharest e a Universitatea Petrol-Gaze Din Ploiesti , institucións de Rumanía.

Programa Erasmus +

A iniciativa forma parte do marco do Programa Erasmus +,  e consistirá nun curso intensivo fundamentado na aprendizaxe das principais tecnoloxías da Industria 4.0, así como o método que emprega a pequena escala o persoal investigador para validar unha hipótese ou teoría.

O alumnado que toma parte do proxecto foi recibido este luns –tras unha formación previa en liña entre o 26 de xuño e o 3 de xullo– no salón de actos Concepción Arenal do Campus Industrial de Ferrol, coa presencia da vicerreitora do Campus de Ferrol e Responsabilidade Social, Ana Ares; o adxunto de Mobilidade e Convenios da Vicerreitoría de Titulacións e Internacionalización, Bruno Casal; o director científico do Centro de Investigación en Tecnoloxías Navais e Industriais, Armando Yáñez; e o director do Campus Industrial da Universidade da Coruña, Marcos Míguez.

Formación teórico-práctica

Durante os próximos días, integrantes do persoal docente e investigador de diversas institucións educativas europeas como a Università degli Studi di Napoli Federico II (Italia), a Universidade do Minho (Portugal), a Tampere University (Finlandia), a University of Belgrade (Serbia) –ademáis da  Universidade de Coruña, ao ser a anfitrioa– estarán ao cargo de instruír unha formación teórico-práctica que se distribuirá en dous módulos comúns centrados na fabricación aditiva ou impresión 3D, e na sensorización de adquisición de datos. Despois desta primeira sección, cada participante poderá escoller a profundización nos métodos experimentais aplicados entre distintas disciplinas: arquitectura naval, enxeñaría mecánica, robótica submarina ou desenvolvemento de polímeros.   

Ademais da formación, o alumnado terá a oportunidade de percorrer varios edificios do Campus da Coruña, como o Centro de Investigación en Tecnoloxías da Información e as Comunicacións, o Centro de Innovación Tecnolóxica en Edificación e Enxeñería Civil, así como a Torre de Hércules.

Tamén tiveron a oportunidade de coñecer os laboratorios do Centro de Investigación en Tecnoloxías Navais e Industriais no Campus de Ferrol e de visitar os puntos máis importantes da cidade naval a nivel turístico e algunhas praias dos arredores.