Entre este venres e mañá sábado, nove bandas en representación do underground galego, nacional e internacional, farán vibrar Mugardos nunha nova edición do Peirao Rock. Dende as 21.00 horas, música de xéneros diversos como rock, heavy metal, stonner ou psicodélico, entre outros, encherán a Praza da Constitución de potencia e enerxía. 

Lóstregos é unha das agrupacións que subirá esta noite ao escenario. Orixinada en 2014 na Coruña e integrada por C. Lukwos (baixo e voz), I. Endv (guitarra e voz), J. Ur (guitarra) e A. Ffynidwydeen (batería), mestura black metal con folclore pagán de Galicia.

C. Lukwos explica que este estilo tan característico ten unha clara intención que é nin máis nin menos que “reivindicar a herdanza cultural de Galicia, o folclore, o paganismo e as súas lendas” a través dunhas temáticas e letras impregnadas de “mitoloxía, contos” e “unha música extrema ligada ao black metal dos anos 90”.

Orixes

Contan, polo momento, cun EP e tres álbumes de estudo que permitiron que a banda adquirise influencia a nivel europeo, movéndose por escenarios de Francia, Bélxica ou Alemaña e festivais como o Resurrection Fest (Viveiro), Barroselas MetalFest (Portugal) ou o Winds of Agony (Barcelona). 

Actualmente, atópanse en plena presentación de “Nai”  –o seu traballo máis recente–, un disco conceptual no que auga, lume, ar e terra, como os catro elementos primordiais da natureza, e o éter, como epílogo, constitúen os puntos clave que conforman a “Nai terra, a matriz de todo”.

As distintas cancións preséntanse “coas súas características propias de cada elemento, como o poder destrutivo ou purificador que cada un ten”, explica o baixista e vocalista. A pesar de que durante estes últimos meses os fans do metal xa pudieron escoitar en directo os temas de “Nai” en distintos lugares españois e europeos, hoxe será a primeira vez que os amosarán nas súas queridas terras galegas que tanto exaltan e aprecian. 

O músico afirma que afrontan esta actuación “con moitas ganas” ao ser “o primeiro concerto que damos en Galiza este ano presentando o álbum”. Tamén resulta significativo o feito de que esta actuación teña lugar na comarca, pois aínda que a maior parte de integrantes da banda sexan de Coruña, o baterista A. Ffynidwydeen é de Ferrol.

O black metal

O baixista define o black metal como “un xénero que naceu como unha contrarresposta aos valores cristiáns”, polo que moitas veces é considerado “satánico, de adoración ao diablo”. Non obstante, dende Lóstregos o que pretenden é “reivindicar os cultos antigos antes de que o cristianismo se achegase a Europa” a modo de resposta contra esta relixión, pero dende e recuperación “das antigas tradicións, lendas,  folclores...” nun lugar “con tanta historia, simbolismo e herdanza  precristiana”.

Tendo en conta estes ideais aseguran que o black metal é un estilo que lles vai “como anel ao dedo”, xa que ademais de ser unha música que levan escoitando moitos anos e conecta coas súas personalidades, poden conxugala coas lendas, os sons populares e o folclore en Galicia, encaixando “moi ben co concepto que tiñamos á hora de crear o grupo”.

Na noite deste venres subirán ás táboas do Peirao Rock e sentirán “a adrenalina de tocar enriba dun escenario”, cuestión que conciben como “un signo de liberdade” nestes tempos nos que non abonda.