“É un prato que, nas festas, nunca faltou enriba da mesa”, comenta Beatriz García, unha das elaboradoras de requeixo na fábrica  de Campo Capela. Esta empresa leva anos adicado á creación de produtos lácteos e manteñen a esencia do traballo de épocas anteriores. 

“O único que aceleramos é a fermentación, polo resto seguimos a facer o requeixo como se fixo toda a vida, aprendímolo na casa”, di García, que fala por ela, pero tamén polas tres persoas que están ao seu carón durante todo o proceso produtivo.

Pero Campo Capela é moito máis que requeixo. Dentro do seu mundo lácteo destacan os queixos –aínda que tamén se pode atopar na súa tenda manteiga e tona–, nos que hai unha oferta tradicional pero, ademais, elementos innovadores como poden ser o queixo con chourizo ou o queixo mouro. Este último é o seu produto estrela, galardoado a nivel mundial.

Versatilidade

Traballan a través dunha cooperativa propia, o que lles permite que a materia prima sexa “quilómetro 0”.
Campo Capela aposta pola frescura, que se traduce en produtos elaborados no mesmo día e que, desta maneira, poden durar máis nas casas. Este é o caso dos queixos –dos que non teñen a necesidade de maduración– mentres que o requeixo precisa tres días de traballo.

Primeiro cállase o leite, despois desnátase de maneira manual e pasa a uns sacos nos que está durante 24 horas. O último día acádase o froito deste esforzo vaciando os recipientes e levándoo a envasar.

Dende a empresa recordan que este alimento ten un gran potencial. Pódese ir moito máis aló do típico postre –que en función dos gustos persoais pode non levar acompañamento– ao que se adoita botar mel ou azucre. 

Eles sacaron, no seu momento, un receitario propio no que se recollían todo tipo de propostas, doces ou salgadas. Como ingrediente está presente en tartas de queixo, base para tostas, magdalenas ou ensaladas.