A produtora teatral viguesa Educa Teatro Producións trae o domingo a Narón o espectáculo infantil “Os tres porquiños. Unha obra musical con bonecos a tamaño real”, que terá lugar ás 17.00 horas no Pazo da Cultura. Trátase dun dos espectáculos de máis éxito representados no último ano nos teatros galegos orientados a pequenos de entre tres e sete anos.
Nesta obra, de 50 minutos de duración e dirixida por Luís Crespo, a produtora ofrece unha revisión da tradicional fábula para adaptala aos novos tempos, incluíndo a figura de Xan, un explorador moi afeccionado aos contos que se adentra no bosque para coñecer os seus personaxes favoritos. Na súa viaxe, ademais de descubrir a historia, o explorador poderá bailar ao ritmo das cinco cancións que compoñen o espectáculo, e que teñen unha clara misión didáctica para que os máis pequenos aprendan ou reforcen coñecementos como os números, as cores ou as prendas de vestir.
Unha aposta que tamén incide en valores como o respecto á natureza, solidariedade ou esforzo.
A técnica dramática empregada polos tres porquiños e o Lobo feroz é a dos corpóreos, personaxes a tamaño real que humanizan a figura dos animais, facilitando a interacción co público e a perfecta visión dende calquera punto do teatro. Ademais, ao remate da actuación, os cativos poderán retratarse cos porquiños Pequeno, Mediano e Maior, e incluso, os máis atrevidos, tamén co Lobo.
As localidades anticipadas para acudir á obra xa están á venda nas billeteiras físicas do Pazo da Cultura por un prezo único de 6,50 euros en horario comercial. As últimas entradas de non agotarse na venda anticipada –onte quedaban unhas 200– poderanse adquirir o mesmo día da función nas billeteiras pero a un prezo de 8 euros. n