Os mómaros saíron onte pola mañá á rúa en Pontedeume por primeira vez durante as festas patronais, nunha primeira xornada na que se realizou a ofrenda floral á Virxe das Virtudes na súa igrexa e o xornalista Evaristo Amado pronunciou o pregón desde o balcón da casa consistorial. A banda de música da escola Charamela, a batucada Os Fenómenos e a orquestra Tambo puxeron a nota musical a un día que anunciaba o ambiente festivo que explotará xa hoxe e ata o mércores 11, en que remate as Peras coa xira ó Eume.
A grande atracción de hoxe é a cucaña marítima, que se realiza nun barco situado entre a ponte de pedra e a ponte de ferro. Alí, os máis novos pelexan por manterse en pé nun pau ensebado que ten, no extremo, unha bandeira. Ese é o trofeo que teñen que acadar antes de caer á auga para gañar un dos tres premios.
A cucaña, que siguen centos de persoas desde terra e en pequenas embarcacións no mar, comezará en torno á unha da tarde, despois de que se celebre a misa, con procesión (con música de Charamela), na honra da Virxe das Virtudes, ás 11.30 horas. Antes volverán saír mómaros e cabezudos á rúa a bailar.
Ó rematar a cucaña realizarase a “queima do galán”, un espectáculo pirotécnico con ruidosas tracas e un boneco en barco que rema cada vez máis rápido ata que a súa cabeza salta polos aires.
Será despois o tempo de voltar á casa para os xantares familiares e tomar forzas para a tarde, que comezará con deporte. Haberá unha exhibición de judo na pista do parque Sarmiento ás seis e un partido de baloncesto no pavillón ás sete.
Os dous acróbatas circenses da compañía Desastronauts ofrecerán o seu espectáculo na rúa ás 19.30 horas, para dar paso, ás 21.00, á primeira das tres actuacións teatrais que haberá durante as festas. Será a comedia “Misión sapiens”, da compañía Malasombra. Luis Iglesia, Xabier Deive, Jouse García, Xoque Carbajal e Marcos Orsi (que tamén dirixe) interpretan esta obra escrita polo dramaturgo naronés José Prieto. A verbena correrá esta noite por conta da orquestra Alarma.
As celebracións continuarán mañá co tradicional concurso de froitas e o martes coa renovación dos votos a San Nicolás de Tolentino e a bendición dos bolos e os fogos artificiais.