Cedeira acollerá un encontro de Música Galega-Portuguesa dedicado ao luso Zeca Afonso

A nova revista e o festival foron presentados onte no concello cedeirés
|

O Auditorio municipal de Cedeira será escenario, do 19 ao 21 de maio, do I Festival de Música Galega-Portuguesa “Traz outro amigo Tambén!” dedicado ao músico José “Zeca” Afonso (1929-1987), autor da canción “Grândola, Vila Morena”, sinal do inicio da Revolución dos Caraveis o 25 de abril de 1974 que rematou coa ditadura lusa.

O programa, presentado onte polo goberno local, comezará o venres 19 coa inaugurción, ás 20.00 horas no Palacete, dunha exposición biográfica e musical sobre a figuran do homenaxeado. A continuación, ás 21.30 horas no Auditorio, terá lugar o festival “Cedeira canta a Zeca”, coa participación de diferentes grupos.

Ao día seguinte, haberá unha charla e mesa redonda sobre o autor para de novo pola noite celebrarse un novo concerto musical con Joao Afonso e Rogério Pires. O domingo pecharase o programa con máis música, desta volta co Grupo de Intervençao da Associaçao José Afonso, un concerto con narrador e exposición de imaxes da vida de Zeca. Tamén durante os tres días do festival, en colaboración con algúns establecementos da vila, haberá posibilidade de gozar da gastronomía lusa.

Revista
O festival dedicado a Zeca Afonso é unha das citas incluídas na nova revista cultural editada polo Concello de Cedeira co obxectivo de difundir entre a veciñanza todas as citas tanto culturais, como de ocio ou turismo, entre outras, programadas ata o mes de agosto na vila.

A publicación, da que neste primeiro número foron tirados 500 exemplares, inclúe un total de 24 páxinas con información sobre todos os eventos programados en diferentes espazos.

Cedeira acollerá un encontro de Música Galega-Portuguesa dedicado ao luso Zeca Afonso