Ferrolterra gardou un minuto de silencio ao mediodía en memoria das 41 mulleres vítimas da violencia machista no que vai de ano. Pero foi a única pausa nunha xornada dedicada a visibilizar un problema con fondas raíces na sociedade e que non existe se non se expón publicamente. A ruptura do silencio é máis necesaria que nunca en plena era Covid. A magnitude da emerxencia sanitaria imponse e acapara toda a atención pero os demais problemas seguen aí e son incluso peores, sobre todo tendo en conta o que puido supor o confinamento na convivencia. Co agravante de que as mulleres son maioría nos traballos –remunerados ou non– de coidado dos demais e en postos esenciais e están tamén por iso máis expostas á enfermidade. Esa foi a aposta este ano: “Visiblizarmos o (in)visíbel”. Con este lema ducias de persoas concentráronse pola tarde ante a sede do edificio administrativo da Xunta, nunha acción convocada polo movemento feminista e que tivo réplica en distintas localidades, incluída a praza do Hospital das Pontes.
As reinvidicacións en torno a manter e mellorar atención á violencia machista foron constantes durante toda a xornada e partiron desde as institucións, o movemento asociativo, a xustiza, o ensino, o eido empresarial e tamén a título persoal. A imposibilidade de promover grandes aglomeracións non impediu que se ideasen formas de conmemorar o Día Internacional para a Eliminación da Violencia contra as Mulleres.
O Concello de Ferrol colocou unha vintena de roseiras fronte á estatua de Concepción Arenal, e alí, con representación dos grupos municipais, o alcalde, Ángel Mato, apelou a “facer máis visible que nunca unha das maiores lacras que padece a sociedade”. “Temos a obriga de traballar por unha sociedade plenamente igualitaria”, engadiu.
Os actos promovidos desde o Concello, que inclúen o alumeado violeta no Jofre e na fonte do Cantón, continuarán hoxe coa instalación do stand da campaña Agresión OFF na praza de España. Alí, de 10.00 a 16.30 horas, levaranse a cabo actividades, atendendo en grupos de tres.
En Narón, que presentou un vídeo propio dentro da campaña “En Negro contra as Violencias”, tamén se fixo un minuto de silencio e un acto de reivindicación ao mediodía, diante do Monumento á Muller da praza da Gándara. A alcaldesa, Marián Ferreiro, lembrou que dúas das mulleres asasinadas este ano eran galegas e subliñou a importancia “de seguir traballando xuntos”.
Narón organizou ademais unha marcha ciclista virtual na que participaron alumnos de Primaria e iluminou de malva a glorieta de Freixeiro e o Pazo da Cultura.
Desde o ensino a actividade tamén foi intensa. A comunidade universitaria organizou unha “performance” as portas de De-seño Industrial. Nos centros da comarca tomáronse fotos aéreas dos patios, compoñendo o lema “A educación é a vacina para acabar co maltrato” e expóñense en establecementos da rúa Real ata o día 30.
En Cabanas houbo un concerto de Sofía Espiñeira; en Fene, 60 establecementos sumáronse á campaña “Fene tece igualdade”; e en Cedeira os distintos departamentos municipais sacáronse imaxes con camisetas de “En Negro”. Ortigueira fallou o concurso de microrrelatos contra a violencia machista, que gañaron os textos presentados baixo os seudónimos Eumelia e Ánxela.