As melodías e danzas tradicionais de Senegal, Polonia e Murcia veñen de estar moi presentes por distintos puntos de Pontedeume, entre o venres e o sábado, na celebración dunha das citas máis consolidadas na localidade, o Festival Internacional de Folclore. Con esta cumpriuse a edición número 36, que se despediu onte cun sorteo de agasallos na praza de San Roque.

Este foi un dos principais escenarios do encontro, onde se situou a cantina e actuaron os grupos participantes deste ano, onte para animar unha sesión vermú e o primeiro día, pola noite, no marco da Gala Internacional.

Os protagonistas foron o ballet folclórico Jammu que, aínda que ten a súa sede en Dakar, nel inclúense músicos e bailaríns de todas as etnias do país, como os Wolof ou Lebu, por exemplo.

Por outra banda veu o conxunto de canto e danza Lany da Universidade de Ciencias da Vida de Poznań, en Polonia, que leva á escena bailes nacionais e tamén de 15 rexións distintas.

Ademais participou Coros y Danzas Francisco Salzillo de Cieza, de Murcia, que tamén percorreu onte a vila pola mañá coa AFC Orballo, organizadora do festival, antes de amenizar o mediodía en San Roque xunto ao resto de agrupacións.