O ciclo musical Sons no Claustro, que se celebra neste emblemático espazo da Casa do Concello de Ortigueira, comeza unha nova edición mañá, onde se pode aproveitar para ver a exposición de Tomás Caula. As actuacións lévanse a cabo os domingos, sempre ás 20.00 e, no caso de que o tempo non acompañe, trasladaranse ao Teatro da Beneficencia.

Habana Café Son estrea a proposta cos seus clásicos da tradición cubana e outros temas actuais, sempre con sabor caribeño, antes de dar paso, o domingo 10, á coral de Cantigas e Agarimos, un dos grupos folclóricos históricos de Galicia comprometidos coa difusión do patrimonio musical.

O seguinte encontro, o día 17, virá a cargo de The Duellist, un proxecto que combina violín, violonchelo e guitarra para interpretar dende música clásica até pezas tradicionais do mundo, pasando por bandas sonoras e como última innovación, o rock.

Ton Risco e Marcos Teira serán os protagonistas do domingo 24, que unen o seu vibráfono e guitarra flamenca jazzística para dar lugar a propostas tan orixinais como a do disco “Circum”.

Para rematar, o proxecto galego Aló Django Swing Trío actuará o día 31, inspirado no jazz, na música manouche e no swing ao estilo de Django Reinhardt.