O Diario Oficial de Galicia (DOG) publicou onte a modificación do decreto no que se establece a estrutura orgánica da Consellería de Presidencia, Xustiza e Deportes, co obxectivo de poder asumir as competencias duns 40 aeródromos non comerciais existentes na comunidade.

O DOG explica que a dirección da política aeronáutica é competencia do Ministerio de Transportes e Movilidad Sostible, que a exerce a través da Dirección Xeral de Aviación Civil e da Axencia Estatal de Seguridade Aérea (AESA). 

Con todo, tal como engade, de conformidade co Estatuto de Autonomía de Galicia, a comunidade ostenta a competencia exclusiva en materia de aeroportos e heliportos non cualificados de interese xeral polo Estado, así como dos aeroportos deportivos, aínda que estas non están a ser exercidas na actualidade.

“Ata o de agora, a tramitación das autorizacións correspondentes aos aeródromos de competencia autonómica, as súas modificacións, así como as funcións de inspección e supervisión, estaban a ser realizadas pola AESA.

 Trátase de infraestruturas destinadas a aeronaves ultralixeiras, hidroaeródromos e heliportos, distintas dos aeródromos de uso público nos que se realizan operacións de transporte comercial de pasaxeiros, mercadorías ou correo, incluídos os servizos de aerotaxi”, apunta o DOG.

Con todo, a Xunta anunciou que promoverá os mecanismos necesarios para formalizar o traspaso destas competencias.

 “Para posibilitar o seu exercicio e desenvolver a normativa correspondente, resulta preciso dotar á Dirección Xeral de Mobilidade dunha nova estrutura administrativa, mediante a creación dun Servizo de Loxística e Instalacións Aeronáuticas e Ferroviarias, que se integrará na Subdirección Xeral de Infraestruturas e Planificación do Transporte”, apuntou.