A UDC e o Grupo Rodonita colaboran para convocar, por medio da cátedra Epifanio Campo, adscrita á EPEF, os III Premios de Investigación Epifanio Campo. Nesta edición, os participantes deberán expoñer os seus traballos nunha xornada aberta ao público, tanto da comunidade universitaria como xeral, na que tamén se celebrará a entrega de galardóns.

Os interesados en participar deberán figurar entre a lista do Catálogo de Investigación da Universidade da Coruña, como integrantes dalgún grupo ou ben a título individual. Así mesmo, poderá concorrer o alumnado matriculado no pasado curso 2024/25 nun programa de doutoramento na UDC ou aquel que levase a cabo tarefas investigadoras no proceso de elaboración do seu Traballo de Fin de Grao ou de Máster, neste mesmo período e baixo a dirección de persoal inscrito no devandito catálogo.

Da mesma maneira que ocorreu na pasada edición, para optar aos premios será preciso achegar o proxecto de investigación a través duns formularios. A novidade reside en que todos os participantes terán que dar a coñecer o traballo presentado a esta iniciativa, que se organiza co obxectivo de fomentar as pesquisas relacionadas coa xestión e valorización de residuos xerados pola actividade industrial, como parte dunha economía circular que axude a coidar do medio ambiente.

Recompensas

Os III Premios de Investigación Epifanio Campo outorgarán dous galardóns, dotados con 6.000 e 4.000 euros, respectivamente, para aqueles traballos que avancen significativamente no eido que se fomenta.
O prazo de inscrición remata o 21 de setembro. Para recibir máis información, pode solicitarse enviando un correo a catedra.epifaniocampo@udc.es.