A XXXIII Semana Cultural na parroquia ferrolá de Esmelle incluíu a Recreación da Malla ao xeito tradicional de mediados do século XX. Esta práctica, que reviviu onte en forma de festa, relacionada co cultivo do trigo, consistía en separar o gran da palla.

Para levar a cabo o proceso, este ano volveuse utilizar a mesma maquinaria, unha malladora orixinal de 1905, doada polo veciño de Covas José María Sanesteban, que foi restaurada polo Proxecto Esmelle para desenvolver esta iniciativa que preserva o recordo dunha tarefa que xa é parte do patrimonio.

Arredor dunha vintena de participantes involucráronse este ano na exhibición da Malla, nalgún caso con vestimenta especial para a ocasión. Este é un de tantos exemplos en Galicia de xuntanzas que se convocaban anualmente para a realización de distintos traballos, boa parte relacionados coas labores agrícolas, e que se complementaban cunha parte de lecer. Na cita colabora a AVV, a comisión de festas, Río d’Aneiro, o Concello, a Deputación e a Cantina de Esmelle.