Proseguen os campamentos urbanos de verán con 120 nenos no mes de xullo

Continúan celebrándose en Ferrol os campamentos urbanos de verán que onte recibiron na ludoteca municipal do Cantón de Molíns a visita do alcalde, José Manuel Rey Varela, acompañado da concelleira de Igualdade e Xuventude, Verónica Casal Míguez. Este campamento, xunto co que se desenvolve no Centro Cívico Carvalho Calero, reúnen a 120 menores que levan a cabo actividades lúdicas e formativas durante este mes.
Un dos obxectivos desta actividade, ademais de ofrecer un espazo de ocio e educativo aos máis pequenos durante as vacacións, é axudar a conciliación da vida familiar e laboral das familias ferrolás.
Así, o rexedor municipal explicou que esta proposta da área de Xuventude conta cun incremento no número de prazas ofertadas no campamento da ludoteca, que pasa de 40 a 80. Rey Varela salientou a importancia da conciliación da vida laboral e familiar dirixida á infancia durante a época de vacacións escolares de verán.  Este campamento está destinado a nenos entre os 3 e os 6 anos.
Pola súa banda, Verónica Casal lembrou que, de maneira paralela a este campamento, está a ter lugar outro no Centro Municipal Carballo Calero, dirixido a nenos entre os 7 e os 12 anos, e no mesmo contan con actividades de importante compoñente educativo, así como lúdico e deportivo. Así, a titular de Xuventude explicou que este ano tamén foi duplicado o número de participantes no Campamento Urbano, contando entre os dous meses de verán cun total de 160 prazas, nos dous meses, fronte ás 80 ofertadas o ano anterior.