Dende este mes de xullo e ata o vindeiro setembro, tres rapazas procedentes dos campamentos saharauis de Tinduf, en Argelia, atópanse en Ferrol acollidas  por outras tantas familias locais, que forman parte do programa que cada ano pon en marcha Solidariade Galega co Pobo Saharaui –Sogaps– en toda a comunidade galega baixo o lema “Vacacións en paz”.

Este martes, parte da corporación municipal, co alcalde José Manuel Rey á fronte, recibiu ás menores, acompañadas das súas familias de verán, nun acto que ven sendo un costume cada temporada estival. No salón de recepcións foron benvidas tres nenas que están a pasar o seu verán na cidade naval, desfrutando do entorno e alonxadas das altas temperaturas que se viven nestes meses en Tinduf.

As pequenas, tal e como se lembrou dende o Concello, ademais de coñecer a cidade, someteranse a revisións médicas ás que non teñen acceso nos campamentos do norte de África nos que viven. Tamén terán a oportunidade de perfeccionar a aprendizaxe da lingua castelá e galega que estudan nos seus programas escolares.

O rexedor municipal foi o encargado de dar a benvida a estas rapazas amosándose confiado en que “estas semanas quedarán gravadas na súa memoria como unha experiencia enriquecedora”. Así mesmo, amosou o respaldo do Concello con iniciativas coma esta, porque “Ferrol é, e seguirá sendo, unha cidade solidaria”.

As rapazas, que como vén sendo habitual recibiron uns obsequios en nome do Concello e dos ferroláns, tamén puideron gozar dun espectáculo que para elas se organizou na mañá de este martes.