Por terceira vez, Equiocio Ferrol reservará no seu salón adicado ao cabalo un espazo para o 
desenvolvemento do EcoMarket. Do 31 de xullo ao 4 de agosto, o público poderá adquirir produtos diversos como roupa, complementos, bixutería, decoración e alimentación da man de dez firmas —da zona, na súa maioría— que teñen a sostibilidade nos seus procesos de elaboración, distribución e venda como valor principal.

As marcas que ofrecerán os seus produtos durante estes catro días serán “Three Hills”, “El Pete de Danny”, “A Linda Landra”, “Quesería Gaia Gourmets”, “Lughna Studio”, “As Cousiñas de Li”, “Marmeladas As Coruxas”, “Sintonía creamos con alma” e “Halyzya sen dedal”. 

Ademais dos distintos postos, que permanecerán abertos de 10.00 a 14.00 horas e de 16.00 a 20.00, algúns dos artesáns impartirán ao longo das xornadas obradoiros gratuítos nos que todas as persoas interesadas deberán inscribirse no posto que organice a actividade, que se encargará de asignar a prazas en función da orde de solicitude. Poderán elaborar pendentes, chaveiros, bixutería, figuras de madeira ou pratos.