domingo 12.07.2020

As asociacións veciñais de Serantes xúntanse de novo para homenaxear aos maiores

A celebración conxunta faise por segundo ano consecutivo nas instalacións da Feira de Mostras
Sala de reuniones del Concello de Ferrol Presentación de la Festa dos Maiores de Serantes
Sala de reuniones del Concello de Ferrol Presentación de la Festa dos Maiores de Serantes

As asociacións veciñais de Viladóniga, Pazos e Serantes únense esta fin de semana para render homenaxe aos maiores nunha festa conxunta que se celebrará por segundo ano consecutivo no recinto de FIMO e que conta de novo co apoio do Concello de Ferrol. Tal e como explicou onte na presentación pública o representante veciñal de Viladóniga, trátase dunha proposta coa que se dá continuidade a un evento que xa celebraban cada unha das entidades por separado. “O ano pasado acordamos facela xuntos por primeira vez, co apoio do Concello”, comentou José Manuel Freire.

A celebración será este sábado, 26 de outubro, ás cinco da tarde, na cafetería do recinto feiral. Fletarase un autobús para facilitar a asistencia. Sairá ás 16.30 horas da asociación de Pazos e pasará por Viladóniga e Serantes. Ao remate fará o percorrido inverso para devolver aos participantes a casa.

“O acto é sinxelo”, explica Freire. Trátase dun “agradecemento á traxectoria vital das persoas maiores de 80 anos porque eles representan todo un cúmulo de experiencia e de traballo que aproveitamos as xeracións que vimos detrás”. E é tamén unha maneira de animalos a “seguir contribuíndo” á vida da comunidade.

Representantes das asociacións veciñais participantes, xunto coa concelleira de Benestar Social, Eva Martínez Montero, presentaron no Concello a actividade, que inclúe unha aposta polo envellecemento activo como forma de mellorar a calidade de vida dos maiores. Estiveron presentes Enrique López Mosquera, de Pazos, e Luis Casas Trinidad, de Serantes. “Para nós é unha obriga participar neste tipo de actividades”, comentou a concelleira. Ademais, recordou que este mes de outubro se lle dedica aos maiores e unha iniciativa coma esta permite prestar máis atención á zona rural e ás súas dificultades específicas. “O colectivo de persoas maiores xeralmente se atopa en situación de vulnerabilidade e na zona rural é todavía maior”.

Homenaxe e música

A actividade comezará cunha charla do doutor Carlos Piñeiro centrada precisamente no envellecemento activo e os beneficios para a saúde de manter unha actividade física e mental acorde coa idade, así como unha dieta saudable. Despois deste acto divulgativo celebrarase a homenaxe aos maiores de 80 anos, con entrega de agasallo aos que se incorporan a esta década durante o 2019. Son unha decena de persoas.

Logo da parte formal será o momento de compartir unha merenda e de gozar coa música de Almudena Meijomil.

Comentarios