Coido que despois destas eleccións pódese afirmar unha vez máis, que case todos os partidos gañaron. Gañou o PP, cun considerable aumento de votos; gañou o PSOE, que resistiu firmemente o asalto de Unidos Podemos; gañou Ciudadanos, que mantivo a súa aspiración de ser chave na formación dun posible goberno; e gañou EU, que terá máis deputados grazas á súa alianza con Podemos. A dúbida está en saber se Podemos gañou tamén, pero penso que quizais iso non o saibamos nunca. Porque se o que quería era gobernar, entón perdeu; mais se o que quería era darlle unha segunda oportunidade ao Sr. Rajoy, entón gañou; e se a súa intención era amolar ao PSOE, ou quería unhas novas eleccións que aportarían unha nova morea de euros por cada deputado conseguido, entón gañou tamén. Porque non parece doado que agora se forme o goberno de cambio que antes non se fixo. Ou sexa, que todos gañan, como sempre. E o pobo perde, como sempre tamén, verdade? Pero se cadra eu estou trabucado...