A actuación artística en Ferrol Vello continúa hoxe co deseño dos 15 lápices de dous metros

A arte e a creatividade seguirán moi presentes durante a xornada de hoxe no barrio de Ferrol Vello co gallo da intervención impulsada polo colectivo Meninas de Canido para poñer en valor os espazos da Primeira Milla do Camiño Inglés, que discorre desde o peirao de Curuxeiras ata a igrexa das Angustias.

O programa, financiado en gran parte pola Deputación da Coruña e que foi moi bo acollido desde o Concello de Ferrol, comezou onte coa creación dos cinco grandes murais –de 4x2,5 metros– nos que outros tantos artistas –Eduardo Hermida, Gonzalo Alonso, Alex Estudio 18m, Yanina Torres e Blanca Vila plasmaron os seus debuxos, inspirados todos nos portos e rexións de orixe dos peregrinos da ruta xacobea que parte da urbe naval.

As creacións, instaladas en soportes móbiles, serán cedidos ao Concello e á Deputación para o seu uso como promoción turística da cidade.
 

Hoxe
A estes cinco creadores sumaranse hoxe outros quince, que desde aproximadamente as once de mañá ocuparanse de deseñar os quince lápices de madeira –de 2,5 metros de altura e 10 de diámetro– que ao final da xornada serán entregados a locais de hostalería do barrio, que os poderán empregar como elemento decorativo. O programa concluirá coa celebración dun concerto de Alféizar na propia Praza Vella. Será sobre as 21.30 horas e servirá para poñer o colofón a unha acción que, tal e como salientan os seus promotores, entre os que se inclúe Eduardo Hermida –creador do proxecto das Meninas de Canido– pretende contribuír a potenciar, dinamizar e embelecer o tramo do Camiño Inglés que pasa por Ferrol.