Sestayo propón que os inquilinos de Recimil se convirtan en propietarios

Imaxe do barrio l.p.
|

Os socialistas presentaron na mañá de onte o seu plan para o barrio de Recimil, que a semana pasada explicaban ós veciños nunha reunión na praza de Sevilla. Os eixes da súa proposta para a zona pasan por que os inquilinos se convirtan en propietarios e por reservar vivenda pública para novos e para persoas con problemas de acceso a un teito.
“Fronte ó abandono de catro anos de Recimil e ás repromesas en campaña electoral, nós presentamos compromisos solventes e ben estudiados sobre o que se vai facer”, comentou Beatriz Sestayo. Será unha “proposta prioritaria” que, se gobernan, comezarán a desenvolver xa en 2015 coa realización dun censo especial no que se fixe que persoas poderán ter a posibilidade de ficar coas súas casas en propiedade. Incluiranse ós arrendamentos históricos e outros sistemas “legais ou legalizables” nunha “decisión valente”, en palabras da candidata socialista á Alcaldía, que é “de xustiza social e de eficacia”. Os custes de pasar a ser propietario gardarán relación tamén cos anos que se leva habitando esas vivendas e pagando os correspondentes alugueiros.
A proposta do PSOE para o barrio reserva unha bolsa de vivendas públicas para os máis novos coa finalidade de “frear a emigración e fixar poboación” nunha zona “que non queremos que se convirta nun gueto”. Neste senso tamén se promoverá a utilización dos baixos comerciais “para o autoemprego”.
A terceira base do proxecto será a habilitación de pisos sociais para persoas en risco de exclusión pois “non pode haber vivendas baleiras e xente sen vivenda. Non se permitirá nun goberno que ten como prioridade ás persoas”, apuntou Sestayo.
O número catro da candidatura socialista, Bruno Díaz, interviu tamén na rolda de prensa na Casa do Pobo para denunciar “que o goberno do Partido Popular non fixo nada en catro anos, perdidos nunha cidade que non ten un segundo que perder”. Calificounos de “vagos e incompetentes” e de que só “pensan nunha solución provisional” cando “desaparecen as posibilidades de facer negocio” cun “pelotazo urbanístico a curto prazo”.
Desde o PSOE recoméndanlle ademais ós veciños que non se desprendan dos documentos de arrendamento nin renuncien á titularidade. Din que na reunión da semana pasada estaban alarmados porque se lles estaba a pedir desde o Concello.

Sestayo propón que os inquilinos de Recimil se convirtan en propietarios