A historiadora e profesora Manuela Santalla regresará esta tarde de venres ao concello ao que está ligada por nexo familiar para presentar o seu libro “Fariñas e muíños en Ferrolterra durante a Ilustración”. O encontro terá lugar na biblioteca municipal de Neda, a partir das 20.00 horas.

Con este traballo publicado no 2023 por Edicións A Laverca, enmarcándose na colección “A herdanza recobrada”, que se volverá a dar a coñecer hoxe, a autora continúa inmersa na súa tarefa de divulgación da historia da súa cidade e do resto da comarca.

Neste exemplar, Manuela Santalla achega ao lector a vida pasada dos muíños de Ferrolterra durante os séculos XVIII e XIX, atendendo especialmente aos “do rei”, un termo que se refire ás Reais fábricas do Ponto e de Xuvia, así como á historia dos seus promotores: os comerciantes franceses Lembeye e Lestache.

Despois de publicar outros volumes nos que a historiadora focaliza directamente na historia deste concello, como “O médico Cebreiro, don Paco da Mercé”, que asina con Rui Santalla, ou  “Muíños, fornos e pan de Neda”, que lanzou con Edicións Embora, a autora volve escoller un selo ferrolán para dar a luz esta última obra: A Laverca, que se dedica a temáticas relacionadas co coñecemento do patrimonio cultural, industrial e histórico.

Da mesma maneira, entre os traballos publicados por Manuela Santalla figuran títulos de marcado interese local como “Vida cotidiana y trabajo en el Ferrol de la Ilustración” e “Manuel de la Cruz, alias ‘Sopiñas’, ¿Capitán de bandoleros o comerciante ferrolano?”, neste último exemplo incluíndo tamén a coautoría de Juan Carlos Rico.