7º-16º
lunes | 29 abril | 2024
Con máis dun centenar de actividades literarias, deportivas, musicais ou académicas, Galicia celebra este 17 de maio, Día das Letras Galegas, a vida e obra de Francisco Fernández del Riego (Lourenzá, Lugo, 7 de xaneiro de 1913 - Vigo, 26 de novembro de 2010) .
A súa vila natal será o epicentro desta xornada, coa celebración do pleno extraordinario da Real Academia Galega (RAG), que comezará ás 12.30 horas no centro multiusos de Ponte de Cuñas, e contará coas intervencións académicas de Xesús. Alonso Montero, Francisco Díaz-Fierros e Margarita Ledo Andión, que abordarán nas súas intervencións diferentes aspectos da figura e obra do homenaxeado.
Así, Alonso Montero afondará no seu discurso nun episodio que ilustra "o importante papel que tivo Fernández del Riego como ponte entre a diáspora galega e o exilio interno". Díaz-Fierros, pola súa banda, centrarase na evolución da paisaxe na obra do homenaxeado e Ledo Andión abordará a relación que Don Paco, prolífico columnista desde os anos 30, mantivo cos medios de comunicación, “consciente da importancia da prensa como esfera pública. O acto será clausurado polo presidente da Real Academia, Víctor F. Freixanes.
Tamén haberá música, este ano a cargo do cuarteto Souto Xímaro (Lourenzá) e a coral Mestre Pacheco (Mondoñedo). O pleno, de entrada gratuíta ata completar o enchemento do local, tamén se poderá seguir en directo na páxina web da RAG, www.academia.gal.
A festa continuará en Lourenzá pola tarde, coa actuación do grupo da Asociación Cultural Osorio Gutiérrez e o concerto de Treixadura a partir das 19.00 horas.
Ademais do acto central en Lourenzá, vilas e institucións de toda Galicia terán actividades en homenaxe a Francisco Fernández del Riego durante esta xornada.
En Pontevedra, a partir das 19.00 horas, celebrarase na Praza da Ferraría a final do certame Música nas Letras. No acto, dirixido por Xurxo Souto, farase entrega dos premios e actuarán en directo as tres bandas finalistas: Javier Lago & Raúl Ben, Álex Outeda e BOHR, que interpretarán as composicións orixinais --baseadas en poemas ou mesturas de versos de unha das figuras homenaxeadas nas Letras Galegas-- coa que participaron neste certame musical.
Na Coruña, os Xardíns de Méndez Núñez acollerán actividades lúdicas, culturais e musicais, con numerosos concertos, así como tertulias, obradoiros e lecturas de textos do promotor desta festa. Os actos desenvolveranse de 11:00 a 20:30 horas.
Por outra banda, en Ourense, a música correrá a cargo de Susana Seivane, que ofrecerá un concerto gratuíto na Praza Maior ás 19:30 horas. Antes, ás 19.00 horas, terá lugar a actuación da Coral Cantiga Xuvenil.
Do mesmo xeito, institucións como a Casa-Museo Rosalía de Castro celebran este aniversario. Así, este mércores acollerá dous actos: un concerto do saxofonista padronés Pablo Castaño e do guitarrista brasileiro Iván Vilela, aos que se sumarán a cantante Felisa Segade; e a presentación do sétimo número de 'Follas Novas'. O Museo Provincial de Lugo tamén ofrece un concerto de Davide Salvado, que se celebrará no xardín do Museo ás 20:30 horas.
Pero tamén o deporte súmase a esta cita. A carreira Camiño das Letras repite este ano en Santiago de Compostela con dúas probas absolutas para escoller: unha de 15 quilómetros e outra de 5 quilómetros que se desenvolven nas inmediacións do Pico Sacro e da Cidade da Cultura. Ao remate, os participantes recibirán un libro e un diploma.
Así mesmo, a CRTVG fará un seguimento dos actos conmemorativos que a RAG e a Xunta realizarán en Lourenzá. En concreto, a TVG emitirá unhas 'Cartas especiais en zigzag' dedicada a Fernández del Riego. Ese mesmo día programarase o documental 'A nosa propia Galaxia', que aborda a celebración dende a perspectiva dun grupo de mozos que traballan na elaboración dun podcast sobre Fernández del Riego.
No G2 ofrecerase o 'Concerto das Letras Galegas', a cargo da Real Filharmonía de Galicia, dirixida polo mestre Maximino Zumalave, e coa participación do Coro de Cámara Rías Baixas, que interpretará algúns dos temas preferidos de Fernández del Riego, con obras de recoñecidos compositores galegos.
Na Radio Galega, 'Galicia por Diante' cambiará a súa estrutura habitual e abandonará os estudios para levar a cabo a edición matinal, xunto co 'Diario Cultural', de Lourenzá, onde seguirá os actos conmemorativos. A emisora entrevistará ao presidente da RAG, Víctor Freixanes, e a diversas personalidades participantes nos actos alí.
Pola tarde, emitirá ás 19.00 horas o monográfico 'Letras Galegas 2022. Francisco Fernández del Riego', producido polo equipo de 'Diario Cultural', no que se expón a súa vida e obra.
