jueves 02.04.2020

Os versos de Rosalía de Castro resoaron nas prazas da bisbarra na véspera do seu día

Ferrol realizou unha ofrenda floral na súa praza de San Xoán e en Fene engadiron ademais unha vertente culinaria
Un instante da ofrenda fl oral institucional que se levou a cabo na praza de Rosalía na mañá de onte | C.F.
Un instante da ofrenda fl oral institucional que se levou a cabo na praza de Rosalía na mañá de onte | C.F.

Rosalía de Castro naceu o 24 de febreiro de 1837 e esa data elíxese para conmemorar o seu día e recoñecer así a esta figura fundamental da literatura galega. Os actos sucedéronse durante a fin de semana, e onte o foco estivo posto en Ferrol e en Fene.

Na cidade naval celebrouse un acto institucional na praza de Rosalía de San Xoán de Filgueira. Deitáronse flores no seu monumento, léronse poemas e tamén houbo un concerto de Xoán Padín. Ademais, a biblioteca ferrolá reparte hoxe marcapáxinas especiais de Rosalía a quen leve prestado un libro.

En Fene houbo tamén un acto institucional coa intervención da corporación, letura de poemas e do manifesto da Asociación de Escritores e Escritoras en Lingua Galega e unha ofrenda floral a carón do monolito. Pero, ademais, desde o consistorio animouse á hostalería a participar servindo como tapa o “Caldo de gloria”, seguindo as intruccións do poema “Miña casiña, meu lar” (auga, sal, unto e coles).

Hoxe mesmo, no Antigo Hospicio, e a instancias da asociación cultural Medulio, haberá un recital músico-poético ao redor de Rosalía, a partir das oito da tarde.

Discurso de Carvalho

A Real Academia Galega permite o acceso a discursos sobre Rosalía de Castro, entre eles o que pronunciou Ricardo Carvalho Calero en 1958 no momento en que ingresaba na institución. Foi en María Pita un 17 de maio, no centenario da publicación de “Cantares gallegos” e cinco anos antes de que empezase a celebrarse o Día das Letras Galegas, que na súa edición inaugural se lle adicou a Rosalía e que neste 2020 centra a súa atención no ferrolán. A intervención de Carvalho foi respondida por Otero Pedrayo. O discurso pode consultarse no apartado de publicacións da web da RAG e titúlase “Contribución ao estudo das fontes literarias de Rosalía”.

Outras aportacións a disposición dos lectores na web foron feitas por Otero Pedrayo, Luz Pozo, Bernardino Graña, Marina Mayoral, Basilio Losada, Francisca Herrera ou Victoriano Taibo.

Comentarios