As Festas de Verán de Mugardos volven prestar este ano especial atención ao público infantil. Unha das propostas pensadas para os máis pequenos da casa e que de seguro atraerá a moita xente o domingo á vila é o tobogán acuático xigante que funcionará, de forma totalmente gratuíta, desde as 16.00 ata as 20.00 horas.
Os nenos e nenas deberán ir con traxe de baño para escorregar pola rampla de máis de 70 metros de lonxitude e caer na piscina inchable que se instalará ao final. A atracción estará no Peteiro e, como o resto dos espectáculos e actividades das festas, será de acceso libre.
Hoxe, pola súa banda, será a quenda para o espectáculo “Circo á feira” da compañía Pistacatro, pioneira en Galicia na posta en marcha de funcións de cabaré e de novo circo. Aéreos, acrobacias, clown, teatro e malabares serán os principais ingredientes da proposta que ás 19.30 horas dará comezo na Praza do Concello.
A programación para o público familiar foi inaugurada o pasado domingo cunha peza do grupo Gazafelhos, aos que onte sucederon os integrantes de Teatro Calavera para achegar ao público a súa obra “Festa pirata na Illa Calavera”.