Os nenos do Marcide aprenden seguridade vial coa presenza de axentes da Garda Civil de Tráfico

Os nenos hospitalizados no Marcide e tamén os que pasaron onte pola mañá por Pediatría contaron coa visita de axentes da Garda Civil de Tráfico da provincia da Coruña. Impartiron a pequenos, pais e profesionais do centro unha didáctica charla sobre seguridade vial, apoiados por debuxos animados e tamén pola presenza dun Papá Noel e dunha fada máxica cargados de agasallos.

Pediatría recibiu unha réplica eléctrica dunha moto da Garda Civil, ademais dunha tableta. Tamén se lles entregaron pinturas de cores e cadernos aos rapaces. Este material conseguiuse a través dunha colecta realizada polos profesionais deste corpo de seguridade.

A charla centrouse en cuestións de seguridade no vehículo que afectan directamente aos nenos. Os axentes ensináronlles a camiñar correctamente polas beirarrúas, a cruzar a estrada e a subirse ao coche sen correr riscos. Tamén lles explicaron como carrexar as mascotas, con cintos especiais ou en caixas específicas para os animais. E, de paso, transmitiron un consello aos adultos a través dos nenos: que advirtan aos condutores de que non poden mirar o móbil mentres están ao volante para evitar accidentes.

Outro aspecto interesante para os nenos tivo que ver coas sillas de seguridade ou coa altura que é necesario acadar para poder ir diante nos vehículos. Son 135 centímetros a marca para deixar de utilizar sillas adaptadas (aínda que se recomendan ata os 150) e tamén para poder viaxar no asento dianteiro. Os nenos aproveitaron para usar o medidor de parede e comprobar se cumprían os requisitos.

Nesta actividade, iniciativa da propia Garda Civil da provincia, participaron unha trintena de persoas, entre elas o xerente da Área Sanitaria, Ángel Facio, e o tenente do destacamento de Tráfico de Ferrol, Francisco Javier López Dopico.