lll

Recibe cada mañana las últimas noticias. REGISTRARME

Recibe las noticias desde Telegram. ÚNETE

Rematan as obras de reurbanización de varias torres en San Valentín

Nestes días concluíu unha nova fase de mellora da accesibilidade, dos servizos soterrados e do aspecto xeral do barrio fenés de San Valentín, concretamente a referida á contorna das torres I, II e III, situadas no centro do mesmo. Alí acometeuse o cambio das beirarrúas seguindo a estética de fases anteriores e o aglomerado do aparcadoiro interior, onde foi necesario reordenar as prazas ante o aumento do espazo dedicado ao tránsito de viandantes. Ademais tamén se aproveitou para repoñer canalizacións soterradas da rede de sumidoiros e de evacuación de pluviais. O investimento total ascende a 182.710 euros (IVE incluído) financiados con fondos do POS+ da Deputación da Coruña.


As obras en cuestión son a terceira actuación que se leva a cabo nos últimos anos nesta zona da vila, onde desde 2018 se executaron proxectos similares nos bloques de vivendas II e V e III e IV “co obxectivo de proseguir coa actualización da accesibilidade e dos servizos básicos nun barrio que acaba de facer medio século”, como informan desde o Concello. “Cando se construíu, San Valentín estaba pensado para un grande número de familias de xente moza traballadora de Astano e cos estándares urbanísticos que había naquel momento. Hoxe as necesidades son outras. Os modelos actuais de habitabilidade piden máis espazo para as persoas e tamén fai falla adaptarse no posible á realidade demográfica do propio barrio facéndoo máis accesible”, explica o concelleiro de Obras, Justo Ardá, que visitou as obras nas últimas xornadas.


O obxecto tanto deste proxecto como dos anteriores “e os que virán no futuro” é a eliminación de barreiras arquitectónicas “e procurar darlle un lavado de cara ata onde se poida aos espazos e equipamentos comúns”, subliñou.


Así, na zona central do barrio, onde se encontran as Torres I, II, e III, acondicionáronse as áreas de paso que enlazan os tres edificios, incluída a zona de aparcamento  que dá á Avenida da Cooperación.  Ademais da aparencia e accesibilidade, a intervención agora rematada tamén se ocupou da actualización dos sistemas de drenaxe de augas fecais e pluviais, de cara a solventar os problemas de filtracións e roturas que acumulaba unha rede soterrada con medio século de antigüidade.


A adxudicataria dos traballos foi a empresa Construcciones González y González S.L. O importe da obra ascendeu a 182.710 euros, impostos incluídos, sufragados con cargo áo POS+ 2021. A este respecto, o alcalde de Fene, Juventino Trigo, destacou o feito de que o Concello “pouco a pouco vai axustando os tempos de execución dos proxectos financiados con axudas provinciais, que noutras épocas, non sabemos por que razón, se demoraban máis do debido”, afirmou. O rexedor avanza que de cara a próximas convocatorias do POS “incluiremos a mellora da accesibilidade e dos servizos das torres IV e V, así como as dos catro bloques que dan á Avenida da Cooperación”. 

Rematan as obras de reurbanización de varias torres en San Valentín

Te puede interesar