A Concellería de Cultura de Ares propón unha nova charla de corte divulgativo para esta mesma tarde, ás 20.00 horas, no salón de actos da Alianza Aresana. Nesta ocasión, a proposta contará coa intervención de Miguel Anxo Seixas Seoane, presidente da Fundación Castelao, un escritor rianxeiro que centrará o discurso do autor da súa biografía na Editorial Galaxia.

Esta obra do historiador que exercerá de conferenciante, que se divide en tres volumes diferentes, estruturará do mesmo xeito o encontro. Así, Seixas Seoane comezará realizando unha panorámica dos principais fitos da cronoloxía persoal de Castelao e iluminará os aspectos máis ignorados ou esquecidos dunha das personalidades clave da cultura galega.

De feito, Alfonso Daniel Rodríguez Castelao foi fundamental na construción da propia identidade da Galicia contemporánea e considérase un clásico da literatura galega. Ademais, destacou como unha persoa polifacética, alén da súa faceta de escritor, xa que o seu traballo tamén se enmarca no ámbito intelectual, das artes plásticas e da política.

Esta iniciativa municipal inclúese no programa conmemorativo do Concello polo Ano Castelao, que se celebra a nivel autonómico neste 2025 con motivo do 75 cabodano do rianxeiro, falecido en Bos Aires o 7 de xaneiro de 1950.

Miguel Anxo Seixas Seoane (Arzúa, 1960) é licenciado en Historia da Arte Moderna e Contemporánea pola Universidade de Santiago de Compostela. Entre as súas obras, amais da biografía titulada “Castelao: Construtor da nación”, destacan “O Camiño de Santiago” (1990), “Ánxel Casal” (1995), “Castelao pintor” (2006) e “Quen fora pedra” (2017).

Exposición

Ao día seguinte desta ponencia, abrirase na Casa da Xuventude de Ares unha mostra de novas pinturas do artista aresán Ramón Casteleiro, que descubriu a súa paixón pouco antes de xubilarse como cirurxián ortopédico.

Aínda que o creador desenvolve tanto a escultura como os óleos, tal e como puido demostrar neste mesmo centro con anteriores propostas, será esta segunda variante a que protagonizará a exposición, que se localizará no andar superior. A selección inclúe unha serie de cadros figurativos e abstractos, estes últimos valéndose das cores, formas xeométricas e xogos de liñas para substituír o estilo de figuración clásica.

O público poderá visitar a mostra até o día 31 deste mes, de luns a venres entre as 10.30 e as 14.00 horas. Ademais, habilitarase unha quenda de tarde que se prolongará á noite, tamén por semana, os martes, mércores e xoves, de 20.30 a 23.00 horas.