Menos bateas, máis ingresos

As críticas do sector marisqueiro da ría de Ferrol ao sistema de depuración intensiva en bateas implantado pola Consellería do Medio Rural e do Mar a comezos de 2012 están apoiadas nos datos que manexa o propio departamento que dirixe Rosa Quintana a través dun dos seus organismos, a Plataforma Tecnolóxica da Pesca, que reflicte un incremento da facturación ao longo deste 2014, o exercicio no que, nesta altura, menos se está a botar man da reinstalación.
Así, decorridos dez meses, a Confraría de Pescadores e Mariscadores de Ferrol ingresou 1.036.000 euros polos 119.500 quilos de ameixa babosa que se venderon pola lonxa de Curuxeiras. O prezo medio por mil gramos –que abrangue non só a ameixa depurada na batea, senón tamén a que se extrae das zonas de libre marisqueo ou B– é nestes intres de 8,66 euros. Hai exactamente un ano, este non chegaba aos 6,60 euros, isto é, un 24% menos. Daquela ingresáronse 300.000 euros menos ca o ano actual e pasaron pola lonxa apenas 9,5 toneladas menos que en 2013. O primeiro ano de reinstalación, a cotización media de toda a ameixa macho que pasou pola lonxa foi de 6,82 euros.
Na Confraría de Pescadores de Barallobre a situación é moi similar. O prezo medio do quilo de ameixa babosa está nos 8,95 euros. Certo é que se puxo á venda menos marisco que hai un ano –105 toneladas–, mais tamén que os ingresos superan en 172.000 euros aos do exercicio precedente, cando a cotización media, igual ca no 2012, non chegou aos sete euros.
As diferenzas económicas son máis substanciais aínda cando se engade outro factor: o tempo no que as bateas estiveron sen se utilizar. En 2012 só o fixeron un mes do verán; en 2013, dous –xullo e agosto– e no actual, perto de catro, contando a segunda quincena de xuño –a última xornada de extracción na zona C das Pías foi o día 17–, os dous meses de verán, todo setembro e case que a metade de outubro, debido, principalmente, a un episodio de toxinas lipofílicas que mantivo pechada a parte externa da ría. n