Popularmente adóitase dicir, que non hai dous (ou dúas) sen tres, para indicar a posibilidade de que algo suceda por terceira vez. Coido que é unha frase incorrecta, pois a verdade é, que non pode haber tres se non hai dous (ou dúas). Iso é o que pasa coas posibles terceiras eleccións, que están a ser empregadas como unha arma contra o Sr. Sánchez. Eu non son quen para defender ao Partido Socialista nin o pretendo, pero sexamos honestos, non caiamos na trampa e botemos contas para saber quen será o culpable de que haxa terceiras eleccións. Vexamos: Houbo as primeiras que deberían ser suficientes, mais o gañador nin se molestou en intentalo; o segundo en votos intentouno, pero fracasou, e houbo que ir ás segundas. Pois ben, de quen foi a culpa de chegar ás segundas? Do único candidato que deu a cara? Evidentemente non. Xa que logo, non pode ser culpable das terceiras, quen non foi culpable das segundas. Porque se non hai dúas, non pode haber tres. Ou si?