A historia, música e pintura das Cantigas de Alfonso X, hoxe nun variado acto no Ateneo

Baixo o epígrafe “As Cantigas de Alfonso X: A súa música, historia e pintura” preséntase hoxe ás 20.00 horas un variado acto no Ateneo Ferrolán ao redor desta xoia da lírica medieval galega presentado xa na Coruña con especial fortuna. A actividade desta tarde inclúe a inauguración da exposición de pinturas do artista ferrolán Pedro Castro, cunha presentación a cargo do doutor en Historia Andrés Pena Graña.
Trátase dunha mostra ao redor desta creación medieval así como dunhas imaxes elaboradas a partir da mitoloxía galega e da arte popular tradicional. Tamén se dará a coñecer o libro “Custodio ou a fe do carboeiro”, do cantante, profesor e escritor Antón de Santiago acerca do roubo do códice calixtino da catedral de Santiago desde un punto de vista humorístico. O acto contará coa presenza da doutora en Filoloxía e profesora Eva Ocampo.
Ademais, ao redor do acto haberá unha actuación musical que contará precisamente con Antón de Santiago, aquí xa como barítono, así como coa soprano Victoria Álvarez, o percusionista Tito Cabezas e á guitarra clásica, Mónica Pita.
Finalmente levarase a cabo un coloquio entre o público e os participantes, e o artista Pedro Castro explicará a técnica ilustradora das cantigas de Santa María e fará interpretacións a partir das viñetas e das ilustracións orixinais desta obra do século XIII.