10º-14º
jueves | 25 abril | 2024
As 22 persoas que estaban en lista de agarda para incorporarse ao programa Xantar da Casa pasarán a formar parte deste servizo que prestan o Concello de Ferrol e o Consorcio Galego de Igualdade e Benestar. Esta foi unha das conclusións da reunión que se celebrou onte entre a concelleira de Benestar Social, Eva Martínez, e o xerente do organismo, Perfecto Rodríguez.
A incorporación de novas persoas ao programa Xantar na Casa era “unha demanda de hai tempo deste equipo de goberno” e “unha decisión que neste momento se fai moi necesaria tendo en conta as consecuencias negativas xeradas pola crise sanitaria”, apuntou a concelleira ferrolá.
Ata o de agora unha quincena de persoas eran beneficiarias dun servizo que consiste na distribución ao fogar dos menús de toda a semana. Diríxese a persoas maiores a tamén ás que están en situación de dependencia.
As 22 persoas que se incorporarán súmanse ás 15 que xa estaban incluídas neste servizo, pasando así a ser 37. A ampliación dos beneficiarios do programa Xantar na Casa nun 40% en toda Galicia foi precisamente unha das medidas anunciadas onte pola Xunta de Galicia dentro dun plan para a recuperación social despois da primeira oleada da pandemia de coronavirus.
Revisión de convenios
Para aumentar ata 37 persoas o programa será necesario revisar nos próximos días o convenio que regula a colaboración entre a administración local e a autonómica. Na reunión entre Martínez e Rodríguez tamen se falou da necesidade de anovar outros documentos, neste caso para o funcionamento de centros de día e de escolas infantís. En Ferrol son dous espazos para as crianzas, en Esteiro e en Caranza, e tamén dous centros de día neste último barrio.
A concelleira explica que en novembro se lle trasladou á Xunta a necesidade de facer unha actualización, coa idea de incrementar de forma paulatina o número de prazas nos centros de día. Este asunto tratarase nunha nova reunión, prevista para o próximo mes.
