O Auditorio de Ferrol acolleu onte o primeiro concerto do barítino ortegano Borja Quiza no que, paradoxalmente, é a fin do ciclo musical municipal “Ferrol en clave lírica”.
O intérprete ofreceu unha selección que denominou “De Galicia para el mundo”, dividida en dúas partes. Na primeira, adicada á ópera, interpretou pezas de Mozart, Bellini ou Donizetti como “Zuberflöte”, “Don Giovanni”, “Don Pasquale”, “Lucia di Lammermoore” ou “I Puritani”. A segunda parte do recital estivo centrada en pezas de zarzuela de Moreno Torroba, Reveriano Soutullo ou o maestro Serrano, entre outros, como “La Linda Tapada”, “Los Gavilanes”, “Luisa Fernanda”, “La Canción del Olvido” e “La del Soto del Parral”. Repertorio no que Quiza amosou a súa mestría e proxección a pesar da súa xuventude.
O cantante ortegano mostrou a razón de que en poucos anos está situado entre os principais cantantes da nova xeración española, con éxitos tan notables como o galardón ao “Mellor intérprete de zarzuela” que lle concederon os Premios Líricos. Despois de rodar “Io, Don Giovanni” ás ordes de Carlos Saura, o novo barítono cantará este papel dentro dunhas semanas en Bélxica. E a próxima temporada regresará ao Liceo de Barcelona para protagonizar “Così fan tutte” de Mozart. n