Miranda: “O PP traballa por levar Galicia á deriva e o BNG faino para sacala a flote”

O teatro Jofre rexistrou onte un cheo absoluto para presenciar o mitin central de campaña do BNG de cara ás próximas eleccións europeas. Con bandeirolas nacionalistas, aplausos e música recibiron os asistentes a Ana Miranda, cabeza de lista do partido ao Parlamento Europeo, e ao portavoz nacional do partido, Xavier Vence, que acompañados por outros cargos políticos na cidade e na comarca defenderon as políticas nacionalistas e fixeron un chamamento á participación nos comicios do vindeiro domingo. Ana Miranda incidiu no seu discurso en que “este modelo de Europa está matando Ferrolterra, coa colaboración expresa do PP e do PSOE” e incidiu en que “mentres o PP traballa por levar a Galicia á deriva, nós, no BNG, facémolo por sacala a flote”.
Foron varios os temas que os diferentes representantes nacionalistas sacaron a relucir nos seus discursos de onte –trala emisión dun vídeo de campaña–para arremeter contra as políticas tanto populares como socialistas e denunciar as súas “nefastas consecuencias” a nivel autonómico e na comarca. O sector naval, o saneamento da ría, as elevadas taxas de desemprego e a emigración dos mozos foron algúns dos temas abordados polos nacionalistas.
“Abonda xa con estes trinta anos de veto, de ver as gradas baleiras, a ría suxa e contaminada porque non hai depuración despois de trece anos e tamén de ver promesas incumpridas, como o dique flotante”, asegurou Ana Miranda. A candidata nacionalista apuntou, en referencia ao sector naval, que foi o PSOE quen na década dos 80 “iniciou a súa demolición”, para a continuación denunciar que “o PP deulle continuidade”. Estas dúas formacións, subliñou Miranda, “meteron á comarca nunha vertente de colapso económico”. A pesar da situación que atravesa o sector, lamentou que “teñamos que aturar a Pepe Blanco pedindo o levantamento do veto cando foi o PSOE quen o puxo e ten un comisario en Bruxelas que non moveu un dedo pola comarca; ou ao PP dicindo que vai levantar o veto cando xa caduca e logo di unha cousa en Galicia e en Madrid e en Bruxelas outra”.
Miranda cargou tamén contra Núñez Feijóo, a quen critiou por comprometer “un barquiño” e acusou de estar preparando “o seu despegue para ir para Madrid”, porque, dixo, “non ten coma nós o corazón en Galicia, senón fóra deste país”. Ademais Miranda instou ao líder dos populares galegos a “vir á terra a dar a cara todo o ano e non só en campaña electoral” e anunciou que a primeira iniciativa que o partido formulará na UE tralo 25 de maio será para que remate o veto á construción civil naval e impulsar unha estratexia comercial que permita competir en igualdade de condicións na construción de barcos, ao tempo que reclamar o dique flotante.
Minutos antes de iniciar Ana Miranda a súa intervención, Xavier Vence denunciaba as “traicións dos sucesivos gobernos de Madrid, Galicia e Europa”, aos que acusou de “deixarnos un panorama desolador”. En Ferrolterra, asegurou “día a día foron destruíndo aquilo que un día fora unha comarca industrial, cunha valerosa clase obreira, e isto é unha vergoña para calquera gobernante, unha catástrofe única en Europa pero non casual, senón resultado dunhas políticas deseñadas desde Europa e que o BNG nunca compartiu”.
En relación co sector naval Vence lamentou o descoñecemento, a estas alturas, dos proxectos que existen tanto no Goberno central como na Xunta tralo fin do veto. “Non debe de haber plans porque aquí anúncianos con anos de antelación e sete ou oito veces”, asegurou.
Entre música e aplausos e pedindo un tras un o voto para o BNG, falaron outros dirixentes nacionalistas da comarca. O portavoz municipal do partido en Ferrol, Iván Rivas, denunciou a “osadía” do PP por anunciar a construción “dunha lancha a motor” cando, declarou, “Ferrol está agonizando e o asteleiro de Fene paralizado” e a ría convertida “nun lodazal”.
A responsable comarcal de Galiza Nova, Alba García, centrou o seu discurso en denunciar a emigración dos mozos, e Xoán Rico, traballador do naval –“sobrevivinte”, segundo se calificou– arremeteu contra as elevadas taxas de desemprego na comarca. Mercedes Tobío, responsable comarcal do BNG, denunciou o “servilismo do PP en Galiza” e subliñou que o BNG “ten que estar, estivo e estará sempre fronte ás políticas dos populares”.