Os alumnos da cidade ferrolá que tomarán parte na cuarta edición do Club de Debate –unha iniciativa na que están implicados nove municipios galegos– tomaron parte onte, durante toda a mañá, nunha sesión formativa celebrada nas instalacións do antigo Hospicio.
Así, os integrantes dos tres equipos que representarán á urbe naval na cita, dous de 4º ESO do colexio Compañía de María e un de 1º de Bacharelato do IES Leixa, recibiron información sobre o regulamento e dinámica da actividade na que van tomar parte, así como as habilidades comunicativas e mesmo algúns consellos básicos para a procura de información e a preparación da documentación que terán que realizar de cara a preparar as súas intervencións nos debates.
Precisamente estes días coñecerase o tema sobre o que xirará a fase zonal, prevista para o vindeiro 7 de marzo no teatro Jofre. Nela competirán nove equipos de Ferrol, Carballo e Negreira. O gañador acadará o billete para a fase final autonómica.
O Club de Debate ten por obxectivo fomentar o emprego da lingua galega entre a mocidade dun xeito “útil e afable”.