A Feira do Cabalo volve facer de Moeche o centro do mundo equino

Feira do Cabalo de Moeche
|

Os amantes do mundo equino volvéronse citar unha vez máis na Feira do Cabalo de Moeche, un evento que organizou por segunda vez a Asociación Ecuestre 23 de Abril, coa colaboración do Concello de Moeche e da Deputación.
A zona de San Ramón recibiu a centos de visitantes procedentes de toda a comarca que gozaron dunha xornada onde non faltou a animación. Así, entre outras cousas e cita incluíu unha completa exposición e venda relacionada co mundo ecuestre, desde os propios cabalos a burros, eguas ou ponis ata cadeiras de montar e o relacionado con este mundo. Tampouco faltaron as actividades gastronómicas e venda de artesanía e a animación durante toda a xornada.
Como cada ano, as competicións foron un motivo de reclamo para asistir a San Ramón, cun total de 3.700 euros do seu presuposto destinados a galardóns. En xornadas de mañá e tarde celebráronse premios de andadura chapeada, aserrada e trotóns; trote, carros de rodas (de dúas e catro), así como as probas de estampa e beleza que recoñeceron á mellor egua de sela, cabalo de sela, poldro menor de tres anos e egua con cría dun ano. Unhas competicións nas que tomaron parte máis dun cento de xinetes e animais procedentes de toda Galicia e incluso de fóra, como Portugal, Castela e Asturias. n 

A Feira do Cabalo volve facer de Moeche o centro do mundo equino