Retiran dous niños de avespa velutina no Concello de Neda

|

Membros da Casa do Mel de Goente, en colaboración co Concello de Neda, retiraron o sábado dous niños de avespa velutina na localidade. Un deles estaba próximo á entrada da fábrica textil de Xuvia, tiña unhas dimensións dun metro de diámetro e metro e medio de altura e estaba situado a vinte metros do chan. O outro localizárono na zona de Maciñeira, a unha altura de 35 metros. As dimensións deste eran lixeriamente menores que o de Xuvia (80 centímetros de diámetro e 1 metro de alto).
Na Casa do Mel de Goente dispoñen dun avanzado equipo preparado para facer fronte as estas alertas. Contan cunha pértiga de 35 metros e tamén fixeron cursos de trepa para achegarse ata eles no caso de que sexa necesario.
A loita dos apicultores contra a praga da avespa asiática (unha especie depredadora das abellas que está mermando de forma alarmante a súa poboación) intensifícase cada ano. A súa presenza en Ferrolterra comezou polo Ortegal, procedente da Mariña lucense e do Cantábrico e cada ano gaña terreo cara o sur.
Desde entidades como a Asociación Galega de Apicultores e os concellos afectados demandan unha maior implicación do goberno autonómico e tamén unha concienciación na sociedade do risco que supón para a biodiversidade esta invasora.

Retiran dous niños de avespa velutina no Concello de Neda