11º-18º
viernes | 19 abril | 2024
“A dama de ferro” inaugurou onte un ciclo de cine na Fundación Novacaixagalicia da cidade ferrolá. Pero nas próximas semanas incorporaranse á programación novas actividades, que inclúen cursos de fotografía, audiovisual para nenos, propostas de desenvolvemento persoal e tamén un club de lectura.
Esta última proposta está coordinada por Pilar Blanco e levarase adiante o segundo martes de cada mes, ata xullo, en dúas quendas de hora e media de duración, ás cinco e ás sete da tarde. Ten un límite de 15 prazas e custa dez euros por sesión (as entradas para esta e para as demais actividades pódense mercar a través de www.servinova.com). A xornada de presentación, gratuíta, será o martes 25 de marzo, ás 19.30 horas. Con esta iniciativa quérese “contribuír a mellorarmos a comprensión lectora” e a “dinamizarmos un ámbito do noso coñecemento que nos axude a estar máis formados e informados”. Búscase o diálogo e o intercambio, de foma que os participantes poidan incluso “cambiar de opinión sobre o libro grazas ás interpretacións que achegan os compañeiros”.
Os cursos de fotografía terán un nivel básico e outro avanzado. O primeiro, de oito horas de duración, será entre o 2 e o 30 de abril, impartido por María Loureiro. Hai 15 prazas e ten un custe de 40 euros. Serán sesións de dúas horas os mércores, entre as sete e as nove da noite). O obradoiro tratará aspectos básicos da fotografía dixital, centrándose no seu funcionamento, aínda que tamén se abordarán aspectos teóricos, incluíndo un “paseo pola historia da fotografía”.
O curso de nivel avanzado será do 7 de maio ó 28 dese mes, tamén os mércores, de sete a nove. Impartirao María Riobóo e custa 40 euros. Nestas castro sesións afondarase en cuestións relacionadas coa captura, os tipos de obxectivos, a edición e catalogación e tamén a cantidade e calidade da luz. Advirten de que é “un programa xenérico” que se pode modificar en función das necesidades e coñecementos dos alumnos inscritos.
A realización persoal así como o desenvolvemento de habilidades comunicativas será o eixo de outras dúas actividades, dirixidas ambas por Modesto Gómez. Terán doce horas de duración e custan 66 euros. Hai un límite de dez prazas pero con menos de sete non se levarán adiante. Presentaranse o 22 de abril, ás 19.30 horas. O taller de “coaching” será os martes, entre o 29 de abril e o 3 de xuño, de sete da tarde a nove da noite. “O coaching axudaranos a pór en valor as nosas bondades e as do noso equipo partindo da toma de conciencia do noso talento e as nosas capacidades. Así mellorará a nosa eficacia e eficiencia social”, apuntan na presentación.
Os luns, do 28 de abril ó 2 de xuño, será a quenda do curso “Luces, cámara, comunicación”, actividade na que se busca “transmitir os mecanismos que propician o éxito na comunicación, cara a unha conferencia, un faladoiro, unha reunión de traballo ou un simple intercambio de opinións”.
