O Concello naronés licitará en 30,3 millóns de euros o contrato de recollida de Residuos Sólidos Urbanos (RSU) así como  a limpeza viaria para os vindeiros dez anos. Así o anunciou onte a alcaldesa da cidade, Marián Ferreiro, que deu a coñecer as características do plego de licitación xunto co edil de Servizos, Ibán Santalla. A rexedora subliñou que no novo contrato se inclúen varias melloras con respecto ao servizo que se presta hoxe. Entre elas explicou que se engadirá a limpeza viaria dos polígonos industriais da Gándara, As Lagoas e Río do Pozo,  onde ata o de agora faise esta tarefa de xeito puntual.

“Consideramos que o actual contrato e bo pero hai algúns apartados que se poden mellorar e nos que queríamos actuar, como os polígonos industriais, os puntos limpos de proximidade e os desbroces na zona rural”, apuntou a rexedora.

O importe máximo anual deste contrato será de 3.036.923 euros, unha contía coa que se recollerán os residuos municipais, se trasladarán á planta de transferencia ou o xestor autorizado e se limparán e desbrozarán vías urbanas, semiurbanas, rurais e os polígonos industriais. Outro dos puntos recollidos no novo contrato, apuntou a alcaldesa, é a subrogación dos postos de traballo actuais “co que se manterá o persoal que está realizando actualmente este servizo na compañía que finalmente resulte adxudicataria do novo contrato”. Ferreiro indicou que o plego está dispoñible na plataforma Narón Participa e que se poden presentar actualmente propostas de mellora. 

Pola súa banda o edil de Servizos asegurou que o sistema de recollida pasará a ser de carga lateral, operando desde a cabina dos camións e manténdose unicamente a carga traseira para as zonas onde a recollida se fai mediante un acceso máis complicado. Ese cambio a carga lateral implicará, tal e como explicou Santalla, “a renovación da contenerización no termo municipal, substituíndo os actuais contenedores de carga traseira e superior. Os de 360 litros cambiaranse por outros cunha capacidade de 3.200 litros nos polígonos industriais e nos centros comerciais e zonas donde se localicen varios establecementos a capacidade será de 1.800 litros”. Un dos obxectivos é “evitar desbordamentos”, o que se acadará tamén incrementando as frecuencias de recollida. Santalla recalcou que a empresa concesionaria disporá dun prazo de 48 horas para que no caso de que se detecte algún desbordamento nos contenedores, se solvente a situación nese período.

Así mesmo, Ferreiro incidiu no feito de que se eliminarán os contenedores soterrados localizados nas inmediacións da Biblioteca municipal, e nos barrios da Gándara, A Solaina, Piñeiros e Xuvia. “Estas isletas pasarán a ter un novo uso como puntos limpos de proximidade, co que os veciños poderán depositar nas mesmas calzado e roupa usados, pilas, baterías ou bombillas, entre outros”, explicou. Ademáis, nos dous primeiros anos a empresa terá que implantar tamén a recollida de orgánicos, apuntou Ferreiro.
No caso da zona rural tamén se contemplan melloras importantes en canto aos desbroces. Por exemplo, a empresa adxudicataria terá que dispoñer de tres tractores máis para realizar estas tarefas, co que dos dous que actualmente as executan, retirarase o máis vello e quedarán operativos catro. “Esta medida permitiranos realizar o doble de desbroces ao ano”, destacou Santalla.

No concurso tamén se valorarán, entre outros, que as empresas inclúan unha barredora de baixo nivel de ruído, entre outros aspectos.