As ofertas literarias ferrolás continúan chegando en Nadal ás librerías da cidade

os reis, que esta semana xa pasaron por canido, visitaron onte o local social do val, en narón l.p.
|

Nadal é unha época óptima para presentar as novidades literarias e un momento en que a industria do libro máis respira. Por exemplo, onte a Central Librera da rúa Dolores acolleu a sinatura de libros de dous autores ferroláns de diferentes xeracións. Así, o profesor Guillermo Ferrández vén de presentar a quinta edición da súa novela “Conacho”, compartindo espazo coa promesa local Cristina Prieto Solano, que acaba de publicar a súa terceira narración “Él, ella” (Editorial Seleer). Esta tarde, a partir das seis do serán, volverá estar Ferrández asinando exemplares das súas novelas ou ensaios como “El ferrolano” ou “La llave inglesa”, editado o pasado ano, como os anteriores, en Edicións Embora.

 

Historia e periodismo

Esta editorial ferrolá vén de publicar no último mes varias novidades literarias ou reeditar, como no caso de Ferrández, case sempre centradas en Ferrol. Así, a profesora Rosa Cal presentou a finais do pasado ano “Los curas contra Franco. Ferrol 1950-1978”, unha voluminosa investigación acerca do papel dos cregos locais na transición democrática. Así mesmo, os historiadores Ana Isabel Bello e Miguel Ángel Vidal Lojo deron a coñecer o volume “La capilla de Serantes”.

O tamén historiador ferrolán Guillermo Llorca Freire publicou o pasado mes o traballo “La Ibense: una heladería artesana en Ferrol”, un recordo familiar e unha crónica do Ferrol desde os anos vinte ata mediados dos 80. No eido periodístico, esta mesma semana persentábase o libro “Ferroláns de seu”, un traballo dos periodistas José Gómez Fandiño e Nicolás Vidal no que reunían 43 das mellores entrevistas realizadas no suplemento Nordesía de Diario de Ferrol a destacados persoeiros de Ferrol e comarca. O volume inclúe as caricaturas orixinais de Juan Veiga.

Xa, no eido da pura creación literaria, hai que destacar o tamén recente poemario “Lusocuria”, o último traballo da autora de Valdoviño Verónica Martínez Delgado, unha obra cun alto contido erótico. Este traballo nace, ademais, dentro da nova editorial O Figurante, dirixida polo poeta e narrador ferrolán Alberte Momán.

As ofertas literarias ferrolás continúan chegando en Nadal ás librerías da cidade