Estudantes dos institutos Saturnino Montojo e Sofía Casanova de Ferrol; Ortigueira; Virxe do Mar, de Noia; Leiras Pulpeiro, de Lugo; e Pontepedriña, de Santiago, reuniranse esta mañá no salón de actos do campus de Ferrol para dirimir a final do Concurso de Mecano organizado polo Campus Industrial de Ferrol.
O obxectivo do certame pasa por estimular a creatividade, o traballo en equipo e achegar o mundo da enxeñaría e a tecnoloxía aos estudantes do último curso dos institutos galegos a través da construción e programación dun robot para posteriormente superar unha serie de obstáculos proxectados nunha “xincana”, segundo se informou desde a Universidade da Coruña.
O concurso consta de dúas fases. Nunha primeira, que xa se desenvolveu, os participantes tiveron que elaborar un vídeo explicativo da súa proposta e subilo a facebook e que ten un peso do 50% na puntuación final (os puntos conseguidos van en función dos “likes” acadados).
A segunda proba é a que terá lugar hoxe. Consiste na presentación e defensa da proposta ante un xurado formado por persoal docente e investigador do Campus Industrial de Ferrol. O premio consistirá nunha cámara de VicTsing Eypro Cámara Acción Deportiva 1080P para cada un dos estudantes gañadores.
A xornada incluirá unha presentación do Campus Industrial e unha visita guiada aos laboratorios universitarios.