O IES Sofía Casanova pechaba o pasado mes de xuño o programa co que ao longo do curso 2013/2014 conmemorou os 50 anos de vida. Medio século no que sempre demostrou “o seu compromiso para ofrecer un ensino de calidade a toda a comarca, que foi o que sempre o distinguiu”, apunta Laura Suárez, a actual directora. Para a profesora, é unha satisfacción ver recoñecido “o duro, esixente e serio traballo cotiá” que se fai nas aulas, polo que a distinción do Concello supón unha gran ledicia para a comunidade educativa do mesmo. No centro estudan uns 530 rapaces.