Ferrol citarase do 25 ao 28 de abril cunha nova edición da Semana da Poesía Salvaxe

A Semana da Poesía Salvaxe volta un mes de abril máis á cidade naval para espallar os versos de diferentes autores por cada recuncho da cidade. O programa impulsado por Guillermo Ferrández, Marcos Lorenzo e Juan Carlos Valle, Karlotti, vivirá do 25 ao 28 de abril a súa undécima edición, na que se renderá unha especial homenaxe a Pinho Valeiras, ao que se lle dedica o cartel deste ano.

O programa comezará o día 25, ás 18.00 horas, coa tradicional proclama poética e no Cantón de Molíns, que contará coa participación, entre outros, de Xurxo Souto.

Ás 20.00 horas a actividade trasladarase ao Teatro Jofre, onde haberá un gran recital poético coa participación de autores como Iolanda Zúñiga, María Do Crebreiro, Felipa Leal, Eva Veiga e Estíbaliz Espinosa Río. No acto lembrarase tamén a “Revoluçao dos cravos”.

Os mercados da Magdalena, Caranza ou Recimil, o Ateneo Ferrolán, a praza do Inferniño ou o local Manchita Cosa serán outros dos escenarios nos que se desenvolva un programa que tamén incluirá música e un percorrido en lancha pola ría onde os versos serán os protagonistas.

Unha sesión vermú na Fundaçom Artábria pechará o sábado 28 un encontro xa consolidado na axenda cultural ferrolá.