A Plataforma Medalla de Galicia a Andrés Do Barro reclama xustiza para a súa memoria

actuación do cantante en ferrol en abril de 1970
|

Desde hai uns días as redes sociais están aínda máis activas. Unha plataforma en Facebook reclama que se lle dea ao cantante ferrolán Andrés Do Barro (1947-1989) a Medalla de Galicia a título póstumo. En carta enviada aos medios polo padronés Fernando Castaño, se lle solicita á Xunta esta mención “pola súa aportación á música e á lingua galega e por ter sido o máximo expoñente en difundila polo mundo adiante no seu día”. O impulsor da iniciativa cre que así se logrará “facer xustiza hacia o seu nome”.

 

agradecemento

Castaño comenta: “Os que admiramos en vida a Andrés Do Barro aínda seguimos reclamando xustiza coa súa memoria, ano tras ano, dende o fatídico día en que nos deixou para sempre. Alguén ten que facer algo para devolvelo dunha vez por todas o moito que fixo por Galicia, polo noso idioma, polos nosos costumes, pola súa xente, por toda a súa entrega á música desta bendita terra. Alguén influente, que teña o suficiente poder de convocatoria e poida deixar resolta esta débeda para con el”.

O impulsor da iniciativa prosegue: “Rememoro nostálxico aquí os últimos días de Andrés Do Barro connosco, cando o seu fiel e leal amigo Nonito Pereira, comentarista musical galego, ideou nos anos 80 para Andrés, e á súa medida, un programa de Radio de tres horas de duración, na Coruña, para axudar nos malos momentos económicos e psicolóxicos que atravesaba Do Barro, sendo xa o inxusto esquecido polos que lle abrazaron e palmearon falsamente as súas costas nos seus días de éxito. Falo da lendaria Radio Feliz, con aquel Andrés Do Barro e os seus Amigos onde el participaba persoalmente falando das súas cousas, en cuxo espazo tiven a sorte de colaborar humildemente con Pereira, e co propio cantante. Nonito, o seu gardián de soños, aínda segue impulsando e encirrando ‘A quen corresponda’ para que Andrés, o noso Do Barro de todos os galegos, teña a súa Medalla de Galicia, a merecida homenaxe que se lle ten que tributar xa, pero xa. Se aínda podemos seguir crendo e recoñecéndoo naqueles, aos que hoxe se lles honra con ela”.

Finalmente, acerca desta nova iniciativa para reivindicar a memoria do autor de “O Tren” e “Corpiño xeitoso”, Castaño comenta: “Dende esta misiva únome a Nonito Pereira. Á solicitude de xustiza cara á memoria de quen nos honrou sendo o primeiro cantante galego que lanzou os seus éxitos na nosa lingua por todo o mundo”.

 

A Plataforma Medalla de Galicia a Andrés Do Barro reclama xustiza para a súa memoria