Os Correspondentes Xuvenís do Montojo despiden o curso coa secretaria xeral

CEIP Os Casais de Fene, visita de la directora xeral de Xuventude, Cristina Pichel, que les va entregar los pasaportes solidarios
|

Un grupo de 34 estudantes do IES Saturnino Montojo participan este curso na iniciativa Correspondentes Xuvenís 3.0, que os converte en divulgadores de información útil para a rapazada e impulsores de actividades entre os seus compañeiros. Como remate de curso, a directora xeral de Xuventude, Participación e Voluntariado, Cristina Pichel, visitou onte o centro para interesarse polo transcurso da iniciativa. Nela, participan tamén alumnos do IES Sofía Casanova, o CIFP Rodolfo Ucha, o IES Ricardo Carballo Calero, o colexio La Salle, o Jorge Juan de Fene e o IES Terra de Trasancos de Narón.


No Saturnino Montojo os rapaces expuxeron o que estiveran facendo ao longo do curso e recibiron as felicitacións da directora xeral, que valorou a importancia do seu traballo para a sua aprendizaxe vital. Tivo tamén que escoitar unha reivindicación: a de que se celebre un campamento final en xuño, como sucedeu o ano pasado (había dous e este curso houbo ata o de agora un e en convocatoria nacional). Pichel comprometeuse a que haberá reunión agora ou en setembro.


A secretaria xeral pasou antes por Fene para visitar os colexios Os Casais e Jorge Juan. Alí fixo entrega a 82 escolares do Pasaporte Solidario, un documento que acredita o traballo que desenvolveron ao longo de todo o curso ao abeiro deste programa. Nos Casais, segundo informan desde a consellería, traballaron valores como a igualdade, recolleron material para reciclar, fixeron de voluntarios na biblioteca ou participaron con accións propias en campañas da ONCE e da Cruz Vermella ou na celebración, en xaneiro, do Día da Paz.


No colexio Jorge Juan colaboraron coa asociación Arraigo, que traballa con persoas en risco de exclusión social, limparon o centro, compartiron tempo coas persoas maiores usuarias do centro social de Fene e tamén fixeron actividades de ocio e deportivas con persoas con parálise cerebral de Aspace-Coruña.

Os Correspondentes Xuvenís do Montojo despiden o curso coa secretaria xeral